Մեր փորձը կուսումնասիրեն նաև տաջիկները

Դեռ երկու ամիս առաջ ՀՀ առողջապահության նախարար Դերենիկ Դումանյանին էր դիմել  Տաջիկստանի Հանրապետության առողջապահության նախարարը` առողջապահական համակարգում արդյունքների հիման վրա ֆինանսավորման Հայաստանի փորձն ուսումնասիրելու, ինչպես նաև Տաջիկստանի Հանրապետության առողջապահության նախարարության աշխատակիցների  համար  կարճաժամկետ ուսումնական դասընթաց կազմակերպելու աջակցության առաջարկով։

Այդ նպատակով արդեն Հայաստանում է Տաջիկստանի Հանրապետության առողջապահության նախարարի առաջին տեղակալ Սաիդա Ջաբիրովայի գլխավորած պատվիրակությունը։ Այսօր պատվիրակությանն ընդունեց ՀՀ առողջապահության նախարարի առաջին տեղակալ Հայկ Դարբինյանը։ Նրա խնդրանքով Սաիդա Ջաբիրովան ընդհանուր գծերով ներկայացրեց Տաջիկստանի առողջապահական համակարգի վիճակը` տեղեկացնելով, որ նաև Համաշխարհային բանկն է խորհուրդ տվել ուսումնասիրել Հայաստանի փորձը։ Նա նշեց, որ, չնայած իրականացվող բարեփոխումներին, լուրջ խնդիրներ կան հատկապես ֆինանսավորման ոլորտում։ Դեռևս բարձր է ստվերային դրամաշրջանառությունը, անհրաժեշտ միջոցների բացակայության պատճառով բնակչության պարտադիր ապահովագրության մասին 2002 թվականին ընդունված օրենքը կասեցվել է մինչև 2014-ը։ Լուրջ խոչընդոտ է մեծաթիվ բնակիչների աշխատանքային միգրացիան, ինչպես նաև չաշխատող ազգաբնակչության բարձր տոկոսը։

Հայկ Դարբինյանն իր հերթին ներկայացրեց անկախացումից հետո Հայաստանի Հանրապետության առողջապահության համակարգում իրականացված բարեփոխումները` շեշտադրելով ֆինանսավորման մեխանիզմների ճիշտ ընտրության կարևորությունը։ 
Հանդիպման ընթացքում կարևորվեց նաև ընտանեկան բժշկի ինստիտուտի կայացումը, որն արդյունավետ է հատկապես գյուղական վայրերում։

Հայկ Դարբինյանը վստահեցրեց, որ նախարարությունը պատրաստակամ է ներկայացնելու ունեցած փորձն ու Տաջիկստանի Հանրապետության առողջապահության նախարարության աշխատակիցների  համար «Առողջապահական համակարգում արդյունքների հիման վրա ֆինանսավորման ներդրումը» կարճաժամկետ դասընթացներ անցկացնելու, որպեսզի պատվիրակության այցը հնարավորինս արդյունավետ լինի։ Նախարարի առաջին տեղակալը նաև նշեց, որ Հայաստանում գտնվելու մեկ շաբաթվա ընթացքում նրանք կհասցնեն հանգամանորեն ծանոթանալու իրենց հետաքրքրող բոլոր հարցերին։ 

Այնուհետև Տաջիկստանի առողջապահության նախարարության պատվիրակությունը ՀՀ առողջապահության նախարարության աշխատակազմի պետական առողջապահական գործակալության պետ Սարո Ծատուրյանի և առողջապահական ծրագրերի բաժնի պետ Ռուզաննա Յուզբաշյանի հետ անցկացրեցին աշխատանքային քննարկումներ ուսումնական դասընթացի կազմակերպման և դրանում ընդգրկվող հարցերի շրջանակի վերաբերյալ։

Հարցեր, պատասխաններ, մեկնաբանություններ